الأربعاء، 17 نوفمبر 2021

محاكمة رقمية



 

في تمام الساعة الثامنة من صباح يوم الأحد

 الحادي والعشرون من نوفمبر من عام 2421

في جلسة المحكمة الرقمية الميتافرسية

صفر الحاجب الآلي بأزيز جهوري: محكمة

 

رئيس الجلسة:

انعقدت هذه الجلسة السيبرانية اليوم في مقر المحكمة الافتراضية للدولة الميتافيرسية العظمى

للنطق بالحكم على المواطنة البشرية M00X10 وذلك في القضية رقم 1111

 

لينقل الميك إلى الإدعاء

 

النيابة: سيدي الرئيس

إن المتهمة البشرية الماثلة هولوجراميا في فضاء سيادتكم

قد ثبت قيامها بجريمة الخيانة العظمى وخرق القوانين الميتافيرسية

حيث أنها قامت منذ عام مضى بالزواج الفيزيائي من البشري السامسونجي المدعو S0X1

ضاربة عرض الحائط بالقوانين الميتافيرسية ومتخلية عن وطنيتها وانتمائها القومي

وقد أثبتت تحريات الشرطة السيبرانية أنها قد أنجبت خارج المعامل من هذا الزواج الفيزيائي الحقير طفلا لا هوية له

معرضة حياة طفل برئ لا ذنب له إلى المخاطر الفيروسية

وأنها لم تكتف بذلك بل قامت بالتربح من نقل فيديوهات إلى اليوتيوبريين من أجل حفنة من البيتكوينات

للإنفاق على أسرتها الضالة

واخترقت الجدران النارية لفضائنا الميتافيرسي بمعاونة رقمية من زوجها وبتكنولوجيات سامسونجية غاشمة

وعرضت الأمن القومي للدولة للاختراق من الهاكرز والفري لانسرز الضالين

وعرضت حوائطنا النارية للخطر من قبل الروبوتس المعاديين

ونحن الذين أسسنا هذا العالم لا يجب أن نكون أقل صرامة من الدولة السامسونجية

التي عاقبت زوجها بتشفير كوده الهولوجرامي

 

سيدي الرئيس

بناء على ما تقدم أرجو ألا تأخذكم بهذه الخائنة شفقة ولا رحمة

وعليه فإنني أطالب بأقصى العقوبة على المتهمة الماثلة في فضاء سيادتكم

وأطالب بمحو سجلها الرقمي من الدولة الميتافيرسية نهائيا

كما أنني أطالب بتعويض رقمي مؤقت قيمته 2000 بيتكوين

حتى تكون عبرة لكل الميتافيرسيين

وشكرا

 

رئيس الجلسة:

ينقل الميك إلى الدفاع:

 

الدفاع: سيدي الرئيس

أرجو أن يتسع صدر عدالتكم إلى تفهم الدوافع التي أدت بالمتهمة  M00X10

إلى ارتكاب هذه الأفعال فسيادتكم بشري مثلها

ولابد أن تثمن الدوافع العاطفية التي أدت بها إلى مثل هذه الأفعال

لم يذكر الزميل في مرافعته أن محاضر الشرطة  الرقمية قد أثبتت حيازتها لملفات بي دي إف

من العصر الفيزيائي الماضي

بها قصصا تاريخية عن الحب والزواج الفيزيائي بين البشريين وعن الإنجاب خارج المعمل

وأن طبيعتها البشرية قد تغلبت عليها

وانها لم تستطع كبت الرغبة في تجربة الحمل والولادة الفيزيائية كما كان يفعل البشريون في العصور البائدة

كما أثبتت التحريات الرقمية أيضا

أن تعاونها مع اليوتيوبريين قد حدث على أثر متابعتها للوثائقيات الهولوجرامية المزورة في دولة اليوتيوب

التي تدعي أن الدولة الميتافرسية تكرر نفس الأخطاء التاريخية للديكتاتوريات البشرية المنقرضة

والتي تدعي أيضا أنه في عصر من العصور

قامت هذه الديكتاتوريات بتقسيم الشعوب البشرية إلى دول متعددة

بخطوط فيزيائية على كوكب الأرض كانت تسمى بالحدود الجغرافية

للتفرقة بين الشعوب والسيطرة على ثرواتها


سيدي الرئيس

إن هذه الوثائقيات التاريخية المزيفة تؤثر في وجدان البشريين من مواطني دولتنا الميتافيرسية العظمي

وتثير في أنفسهم الخوف من أن يكرر التاريخ نفسه

وأن تكون سياستنا في رقمنة الجدران النارية المعاصرة

مماثلة لسياسة الحدود الجغرافية التي يدعيها اليوتيوبريون

بل أنهم ينشرون أفكارا شاذة عن عالم جديد

لا فرق فيه بين ميكروسوفتي وفيسبوكي ويسمح فيه بالتآخي بين الجوجليين والغوغاء من التيكتوكرز

 

سيدي الرئيس

ارجو أن تشمل عدالة سيادتكم المتهمة بالرحمة البشرية

إن لم يكن من أجلها فليكن من أجل طفلها البائس

الذي لم يكن له ذنب في إنجابه خارج المعامل

فنحكم عليه أن يعيش عمره كله بلا هوية رقمية

 

وختاما لا يسعني إلا أن أذكر عدالتكم  بالقول المأثور

من لم يكن منكم بلا خطيئة ... فليلقها بهاكر

 

بعد سماع مرافعة الدفاع

حكمت المحكمة هولوجراميا بالآتي:

أولا: يتم مسح الطفل البشري الوليد معمليا للإطمئنان على سلامته الفيزيائية ومنحه هوية رقمية ميتافرسية

وإيداعه بدار الرعاية الرقمية محميا من المؤثرات اليوتيوبرية المعادية وخالية من البي دي إفس


ثانيا: تكليف جهاز الأمن الرقمي بتشفير الوثائقيات الهولوجرامية التي تبث من قبل اليوتيوبريين

وحجبها أفكارهم تماما عن البشريين في الدولة الميتافيرسية


ثالثا: معاقبة السيدة M00X10

بتشفير هويتها الميتافيرسية لمدة عامين

وتغريمها مبلغ 500 بيتكوين للحق المدني

و100 بيتكوين أتعاب المحاماه

 

رابعا: نفي المذنبة M00X10 

إلى الدولة الأمازونية في السيرفرات المجاورة

للعمل بالأشغال الفيزيائية الشاقة في توصيل الطلبات لمدة عامين

 

أطفئت الجلسة

زززززززززز


#سفسطة

الثلاثاء، 19 أكتوبر 2021

الأحد، 13 يونيو 2021

ممنوع دخول المحجبات

 





 

مستر "ماو" راجل صيني ملحد عنده شركة سياحة في مصر وبيتكلم عربي لبلب

عمل إجتماع لبعض موظفي التسويق في شركته واختار منهم ثلاثة فقط

دار بينهم هذا الحوار

 

مستر ماو:

صباح الخير يا شباب .. أنا اخترتكم النهاردة إنتوا الثلاثة فقط

معاذ ورقية وشادي

لكي أناقش رؤيتكم لفكرة إنشاء منتجع سياحي إسلامي بالساحل الشمالي

 

شادي: واشمعنى إحنا الثلاثة فقط يا مستر ماو


مستر ماو: لأني عاوز أناقش معكم شوية حاجات مش فاهمها على ضوء موضوع منع دخول المحجبات لبعض الأماكن السياحية وعلى الرغم من إجادتي للعربية إلا إن الموضوعات الدينية محتاج أسمعها من وجهة نظر أصحابها


شادي: يعني حضرتك إخترتنا لأننا مسلمين؟

مستر ماو: حاجة زي كدة .. أنا اخترت معاذ ورقية لأنهم متزوجين ورقية محجبة واخترتك يا شادي علشان إنت فلاتي


شادي: إيه فلاتي دي يا مستر ماو .. إزاي يعني


مستر ماو: مش موضوعنا يا شادي خليني أشوف رأيكم إيه في بعض الأمور علشان أعرف أخذ قرار استراتيجي هام


معاذ: والقرار بخصوص إيه يا مستر ماو


مستر ماو: عاوز أعمل منتجع سياحي إسلامي وعاوز رأيكم!


معاذ: إنت بتفكر تدخل في الإسلام يا مستر ماو


مستر ماو: أنا أفكر في دراسة جدوى لاستقطاب شريحة من المجتمع لتوفير احتياجتها السياحية لتحقيق أرباح أكثر ... هذا كل ما يهمني ... دعوني أبدا برقية ..

هل سبق منعك من دخول أي مكان سياحي بسبب حجابك!


رقية: لأ طبعا


مستر ماو: والتأكيد اللي في نبرتك ده معناه إن دي إشاعات


رقية: لأ مش إشاعات ... بيحصل مع كتير غيري ... لكن أنا مش باروح الأماكن دي أصلا

مستر ماو: تماااام ... هذا هو بيت القصيد يا رقية ... وليه مش بتروحي الأماكن دي أصلا

رقية: لأن فيها حاجات تتعارض مع ديني


مستر ماو: طيب ما هو فيه مسلمات غيرك بيروحوا الأماكن دي

رقية: أنا مش مسئولة عنهم


مستر ماو: رقية ... إحنا مش بنتناقش في موضوع ديني ... بلاش الحمية دي

أنا باعمل دراسة تسويقية ليس إلا .. خليني أسألك السؤال بطريقة أخرى

يا رقية ... كم من النساء في تقديرك يمتنعن عن الذهاب إلى الأماكن السياحية لوجود أمور تتعارض مع معتقداتهن الدينية!


معاذ: مش النساء فقط يا مستر ماو ... الرجال أيضا


مستر ماو: أيوة يا سيدي محتاج أعرف حاجتين .. في تقديرك ... كم نسبة الممتنعين عن التواجد في بعض الأماكن السياحية بإرادتهم ... وما هي الأشياء التي تمنعهم من التواجد في هذه الأماكن

 

شادي: بص يا مستر ماو ... أنا معرفش إنت وصلت في العربي لغاية فين ... بس دول الجماعة المتشددين اللي بيسموا السياحة مليطة وكدة

 

مستر ماو: مش قلتلك فلاتي ..

 

معاذ: مستر ماو ... الموضوع يتلخص في نقطتين أساسيتين

الخمور ... والعري والاختلاط

أمور لا يقبلها المسلم الملتزم

 

مستر ماو: الله يفتح عليك يا معاذ .. هو ده الكلام المفيد ... يعني لو عملنا منتجع سياحي بدون الحاجات دي هنقدر نكسب الشريحة دي من الماركت

 

رقية: ممكن يا مستر ماو الديزاينر اللي هيخطط المنتجع يحترم بعض النقاط اللي يقدر بيها يستقطب الملتزمين

 

مستر ماو: تمام يا رقية .... النقاط بسرعة وأنا هاكتب وراكي


رقية: أنا شخصيا لا أرغب في التواجد في مكان فيه خمور أصلا

شادي: حتى لو مش هاتشربي !


رقية: أستغفر الله يا أخي ... ما هو أنا طبعا مش بشرب لكن مجرد إحساسي إني قريبة من البار بيوترني ... وبعدين مضمنش سلوك السكرانين في المكان

 

مستر ماو: سيبك منه ... وإيه كمان ... كملي


رقية: أنا كمحجبة بيكون نفسي جدا أنزل البيسين وألعب في أكوا بارك لكن مش لدرجة إني أغضب ربنا علشان أعمل حاجة نفسي فيها

 

شادي: طيب ما تنزلي بمايوة شرعي!

مستر ماو: إيه رأيك في كلام الواد ده!


رقية: بص يا مستر ماو ... أنا لو حبيت أكون على حريتي تعمل حمام سيدات مغطى 

تماما ويكون عليه إداريات ستات لكن برضه يكون فيه شمس وهوا


شادي: كدة تنزلي بالبكيني وتاخدي راحتك!

معاذ: أسكت يا شادي


رقية: مش ده اللي أقصده .. أقصد إني حتى لو لابسة هدومي مينفعش أتنطط واتزحلق وابلبط والرجالة بتتفرج عليا .. ده بالنسبة لي عيب ومرفوض

مستر ماو: جميل ... يعني منتجع بدون بار ولا خمور خالص .. ويكون فيه ألعاب مائية مغطاة للسيدات .. هو ده كل المطلوب

 

معاذ: مش بس كده يا مستر ماو ... أوقات الترفيه المسائية في معظم المنتجعات عبارة عن بيست ودي جى ورقص للصبح

 

مستر ماو: يعني إنت عاوز منتجع سياحي نعمل فيه دروس دينية

شادي: هههه .... رد يا شيخنا !!


معاذ: بص يا مستر ماو ... متروحش للإكستريم ... يعني مينفعش المنتجع ميكونش فيه مسجد ولا أذان .. لأن الملتزم مش بينسى دينه في أجازته

يعني عدم وجود البيست والدي جى العالي والرقص مش معناه إني عاوز بدل منه دروس دينية .. لكن ممكن ندوات ثقافية في موضوعات لها قيمة يعني


شادي: متروح تصيف في الأزهر أحسن ههههه


معاذ: يا أخي دي وجهة نظري .. أنا شخصيا مبصيفش .. بسبب الحاجات دي


مستر ماو: كويس جدا ... تصميم إنشائي يحفظ خصوصية الجنسين بدون اختلاط وبرامج ترفيه مسائية في موضوعات ثقافية ومسجد وأذان

حاجة تانية؟


شادي: ونسميه منتجع القادسية للجهاد الترفيهي
ونكتب عليه من برة ... ممنوع دخول السافرات

هههههههههههه

 

مستر ماو: مين السافلات دول!

شادي: وعامل صايع في العربي!


رقية: شادي بيهزر ... هو يقصد الغير محجبات ... لكن أظن إن المكان مش هيكون محبوب لغير الملتزمات بشكل عام يعني ... لكن المحتشمات هيحبوه جدا


مستر ماو: طيب ... هو الناس المتفقة مع وجهة نظر معاذ ورقية بيصيفوا فين!

رقية: محبوسين يا مستر ماو


مستر ماو: يعني لو بدأنا حاجة زي كدة ... هتكون الوحيدة من نوعها .. والماركت شير هيكون عالي جدا

 

شادي: يعني المنافسين هيسكتولك يا مستر ماو!

مستر ماو: المنافسة شئ متوقع .. وأنا أرحب بالمنافسة لأنها بتكون ملهمة

شادي: ملهمة إيه يا عم ماو ... إنت فاكر المنافسين هيعملوا زيك

مستر ماو: أما هيعملوا إيه يا ناصح

شادي: ههههه ... المنتجع ده هيجذب الملتحين والمنتقبات

مستر ماو: وبعدين!

شادي: الشركات المنافسة هتبلغ الأمن بأي بتنجان ... يتشمع والناس تكمل أجازتها في منتجع طرة الترفيهي ... هههههههه

مستر ماو: بلاش مبالغة يا شادي


معاذ: اعمل التصميم يا مستر ماو ونسوق على الماكيت وناخد رد فعل السوق بشكل عملي وبعد كده نحكم

مستر ماو: عل بركة الله

شادي: مستر ماو ... صلي على النبي في قلبك كدة وفكر كويس


مستر ماو: برجاء استكمال الدراسة ودعمها بالارقام كلما أمكن

وعاوز تقارير مكتوبة من غير سفسطة

اتفضلوا

محاكمة رقمية

  في تمام الساعة الثامنة من صباح يوم الأحد   الحادي والعشرون من نوفمبر من عام 2421 في جلسة المحكمة الرقمية الميتافرسية صفر الحاجب الآل...