واخد بالك انت

 

ركبت تاكسي من شارع مراد بالجيزة الساعة الواحدة صباحا
كان الشارع زحمة جدا نتيجة أعمال حفر نفق جديد
وسبب الزحام كان تنزيل مولدات كاتربيللر ضخمة من أعلى شاحنات

السائق ابن بلد في منتصف الستينات
وطبعا الدردشة مع السائق بتكون عادة مؤكدة في الزحمة

- متخافشي يا هندسة هتلحق السحور إن شاء الله

- ربنا يسهل واضح إنهم بينزلوا معدات تقيلة

- فعلا يا هندسة بينزلوا جينيراتورز كات

- ما شاء الله واضح إنك بتفهم في المعدات التقيلة يا حاج

- آه امال ايه أنا اشتغلت سنين في البحر

- وكنت شغال إيه في البحر

- أنا كنت ثيرد إنجنييير في غرفة الماكينات على مركب يوناني
طيب وليه سيبت شغلانة زي دي يا حاج

- جيتلي بقى يا هندسة
الكلام ده كان في أواخر السبعينات
كنت شغال على مركب يوناني ومعايا زميل مزيت للمكن .. نيجيري يعني من نيجيريا
نيجيريا اللي كنت بقول عليها بلد القرود
واخد بالك إنت

وبعدين المركب غرقت عند سواحل إيطاليا
المهم ربنا نجانا وطلعنا عايشين وكل أوراقنا غرقت مع المركب
الأونر بتاع الشركة جالنا وعمل معانا الصح
وقال معاكم 15 يوم تجيبوا بدل فاقد للأوراق
واخد بالك إنت

زميلي النيجيري خدني معاه ورحنا اتصورنا
وبعدين رحنا القنصلية النيجيرية
دخلنا القنصلية بدون أوراق وقعدونا في مضيفة
أكلونا وشربونا وسابونا ساعة كدة
واخد بالك إنت

وبعدين جالنا راجل محترم جدا .. بدلة وشياكة وبيكلم باحترام
قاللي أوامرك .. قلت شكرا .. زميلي حكاله الحكاية
سمع الحكاية من غير مقاطعة
وبعدين دخل شوية ورجع معاه ظرف مقفول
قال له خد الظرف ده ولومعاك صور هاتها
الراجل اداله 3 صور
قال له من فضلك إنتظر نصف ساعة
الراجل فتح الظرف وكان فيه رزمة فلوس
الله يسهلو
واخد بالك إنت

وبعد نصف ساعة رجع ومعاه باسبور جديد
الراجل سلم عليه وشكره ومشينا

قلتله .. قضيت يا عمنا .. تعال معايا بقي القنصلية المصرية
نخلص ونرجع على الشركة بالأوراق
واخد بالك إنت

المهم رحت القنصلية
من على الباب واحد أمنجي سألني من وراء القضبان
خير
حكيتله الحكاية
قاللي قصر إنت هتحكي قصة حياتك .. عاوز إيه يعني
قلتله عاوز أوراق بدل فاقد
قاللي هات صورتين وتعال بكرة
أخد الصورتين ومشينا

تاني يوم زميلي النيجري رجع لأكل عيشه
ورحت القنصلية لوحدي
لقيتهم بيسلموني إستمارة عودة إلى أرض الوطن
قلت للأمن أنا عاوز جواز سفر
قالولي هو ده إللي عندنا
قلتلهم عاوز أقابل القنصل
وأنا صوتي عالي زي ما انت سامع
واخد بالك إنت

دخلوني للقنصل
قال لي خير
قلتله أنا عاوز جواز بدل فاقد
قال مينفعشي
ترجع تعمله من مصر
يا باشا ميتفعشي لازم أودي الورق للشركة قبل 15 يوم
لو مش عاجبك روح اشتكي في الخارجية
قلت: حسبي الله ونعم الوكيل
واخد بالك إنت

قال لي هات الاستمارة
وكتب عليها بالقلم الأحمر
يرجى التحقق من شخصيته في أرض الوطن
وطلب الأمن
واخد بالك إنت

من الأمن .. على المطار .. على مصر .. على الترحيلات .. على قسم الخليفة .. على لاظوغلي
اللفة دي والأسورة الفضة في ايدي .. خدتلها 42 يوم
كتر خيرهم بتوع لاظوغلي
بعد الـ 42 يوم
قالولي إنت راجل زي الفل
ممكن تروح تعمل جواز سفر
رحت عملت بطاقة
واشتغلت على تاكس
واخد بالك إنت

- متاخدش في بالك يا حاج
كل سنة وإنت طيب

تعليقات

المشاركات الشائعة من هذه المدونة

ربنا يحفظك يا ولدي

الاجتماع الأخير

والمصحف أنا مسيحي