ممنوع دخول المحجبات

 





 

مستر "ماو" راجل صيني ملحد عنده شركة سياحة في مصر وبيتكلم عربي لبلب

عمل إجتماع لبعض موظفي التسويق في شركته واختار منهم ثلاثة فقط

دار بينهم هذا الحوار

 

مستر ماو:

صباح الخير يا شباب .. أنا اخترتكم النهاردة إنتوا الثلاثة فقط

معاذ ورقية وشادي

لكي أناقش رؤيتكم لفكرة إنشاء منتجع سياحي إسلامي بالساحل الشمالي

 

شادي: واشمعنى إحنا الثلاثة فقط يا مستر ماو


مستر ماو: لأني عاوز أناقش معكم شوية حاجات مش فاهمها على ضوء موضوع منع دخول المحجبات لبعض الأماكن السياحية وعلى الرغم من إجادتي للعربية إلا إن الموضوعات الدينية محتاج أسمعها من وجهة نظر أصحابها


شادي: يعني حضرتك إخترتنا لأننا مسلمين؟

مستر ماو: حاجة زي كدة .. أنا اخترت معاذ ورقية لأنهم متزوجين ورقية محجبة واخترتك يا شادي علشان إنت فلاتي


شادي: إيه فلاتي دي يا مستر ماو .. إزاي يعني


مستر ماو: مش موضوعنا يا شادي خليني أشوف رأيكم إيه في بعض الأمور علشان أعرف أخذ قرار استراتيجي هام


معاذ: والقرار بخصوص إيه يا مستر ماو


مستر ماو: عاوز أعمل منتجع سياحي إسلامي وعاوز رأيكم!


معاذ: إنت بتفكر تدخل في الإسلام يا مستر ماو


مستر ماو: أنا أفكر في دراسة جدوى لاستقطاب شريحة من المجتمع لتوفير احتياجتها السياحية لتحقيق أرباح أكثر ... هذا كل ما يهمني ... دعوني أبدا برقية ..

هل سبق منعك من دخول أي مكان سياحي بسبب حجابك!


رقية: لأ طبعا


مستر ماو: والتأكيد اللي في نبرتك ده معناه إن دي إشاعات


رقية: لأ مش إشاعات ... بيحصل مع كتير غيري ... لكن أنا مش باروح الأماكن دي أصلا

مستر ماو: تماااام ... هذا هو بيت القصيد يا رقية ... وليه مش بتروحي الأماكن دي أصلا

رقية: لأن فيها حاجات تتعارض مع ديني


مستر ماو: طيب ما هو فيه مسلمات غيرك بيروحوا الأماكن دي

رقية: أنا مش مسئولة عنهم


مستر ماو: رقية ... إحنا مش بنتناقش في موضوع ديني ... بلاش الحمية دي

أنا باعمل دراسة تسويقية ليس إلا .. خليني أسألك السؤال بطريقة أخرى

يا رقية ... كم من النساء في تقديرك يمتنعن عن الذهاب إلى الأماكن السياحية لوجود أمور تتعارض مع معتقداتهن الدينية!


معاذ: مش النساء فقط يا مستر ماو ... الرجال أيضا


مستر ماو: أيوة يا سيدي محتاج أعرف حاجتين .. في تقديرك ... كم نسبة الممتنعين عن التواجد في بعض الأماكن السياحية بإرادتهم ... وما هي الأشياء التي تمنعهم من التواجد في هذه الأماكن

 

شادي: بص يا مستر ماو ... أنا معرفش إنت وصلت في العربي لغاية فين ... بس دول الجماعة المتشددين اللي بيسموا السياحة مليطة وكدة

 

مستر ماو: مش قلتلك فلاتي ..

 

معاذ: مستر ماو ... الموضوع يتلخص في نقطتين أساسيتين

الخمور ... والعري والاختلاط

أمور لا يقبلها المسلم الملتزم

 

مستر ماو: الله يفتح عليك يا معاذ .. هو ده الكلام المفيد ... يعني لو عملنا منتجع سياحي بدون الحاجات دي هنقدر نكسب الشريحة دي من الماركت

 

رقية: ممكن يا مستر ماو الديزاينر اللي هيخطط المنتجع يحترم بعض النقاط اللي يقدر بيها يستقطب الملتزمين

 

مستر ماو: تمام يا رقية .... النقاط بسرعة وأنا هاكتب وراكي


رقية: أنا شخصيا لا أرغب في التواجد في مكان فيه خمور أصلا

شادي: حتى لو مش هاتشربي !


رقية: أستغفر الله يا أخي ... ما هو أنا طبعا مش بشرب لكن مجرد إحساسي إني قريبة من البار بيوترني ... وبعدين مضمنش سلوك السكرانين في المكان

 

مستر ماو: سيبك منه ... وإيه كمان ... كملي


رقية: أنا كمحجبة بيكون نفسي جدا أنزل البيسين وألعب في أكوا بارك لكن مش لدرجة إني أغضب ربنا علشان أعمل حاجة نفسي فيها

 

شادي: طيب ما تنزلي بمايوة شرعي!

مستر ماو: إيه رأيك في كلام الواد ده!


رقية: بص يا مستر ماو ... أنا لو حبيت أكون على حريتي تعمل حمام سيدات مغطى 

تماما ويكون عليه إداريات ستات لكن برضه يكون فيه شمس وهوا


شادي: كدة تنزلي بالبكيني وتاخدي راحتك!

معاذ: أسكت يا شادي


رقية: مش ده اللي أقصده .. أقصد إني حتى لو لابسة هدومي مينفعش أتنطط واتزحلق وابلبط والرجالة بتتفرج عليا .. ده بالنسبة لي عيب ومرفوض

مستر ماو: جميل ... يعني منتجع بدون بار ولا خمور خالص .. ويكون فيه ألعاب مائية مغطاة للسيدات .. هو ده كل المطلوب

 

معاذ: مش بس كده يا مستر ماو ... أوقات الترفيه المسائية في معظم المنتجعات عبارة عن بيست ودي جى ورقص للصبح

 

مستر ماو: يعني إنت عاوز منتجع سياحي نعمل فيه دروس دينية

شادي: هههه .... رد يا شيخنا !!


معاذ: بص يا مستر ماو ... متروحش للإكستريم ... يعني مينفعش المنتجع ميكونش فيه مسجد ولا أذان .. لأن الملتزم مش بينسى دينه في أجازته

يعني عدم وجود البيست والدي جى العالي والرقص مش معناه إني عاوز بدل منه دروس دينية .. لكن ممكن ندوات ثقافية في موضوعات لها قيمة يعني


شادي: متروح تصيف في الأزهر أحسن ههههه


معاذ: يا أخي دي وجهة نظري .. أنا شخصيا مبصيفش .. بسبب الحاجات دي


مستر ماو: كويس جدا ... تصميم إنشائي يحفظ خصوصية الجنسين بدون اختلاط وبرامج ترفيه مسائية في موضوعات ثقافية ومسجد وأذان

حاجة تانية؟


شادي: ونسميه منتجع القادسية للجهاد الترفيهي
ونكتب عليه من برة ... ممنوع دخول السافرات

هههههههههههه

 

مستر ماو: مين السافلات دول!

شادي: وعامل صايع في العربي!


رقية: شادي بيهزر ... هو يقصد الغير محجبات ... لكن أظن إن المكان مش هيكون محبوب لغير الملتزمات بشكل عام يعني ... لكن المحتشمات هيحبوه جدا


مستر ماو: طيب ... هو الناس المتفقة مع وجهة نظر معاذ ورقية بيصيفوا فين!

رقية: محبوسين يا مستر ماو


مستر ماو: يعني لو بدأنا حاجة زي كدة ... هتكون الوحيدة من نوعها .. والماركت شير هيكون عالي جدا

 

شادي: يعني المنافسين هيسكتولك يا مستر ماو!

مستر ماو: المنافسة شئ متوقع .. وأنا أرحب بالمنافسة لأنها بتكون ملهمة

شادي: ملهمة إيه يا عم ماو ... إنت فاكر المنافسين هيعملوا زيك

مستر ماو: أما هيعملوا إيه يا ناصح

شادي: ههههه ... المنتجع ده هيجذب الملتحين والمنتقبات

مستر ماو: وبعدين!

شادي: الشركات المنافسة هتبلغ الأمن بأي بتنجان ... يتشمع والناس تكمل أجازتها في منتجع طرة الترفيهي ... هههههههه

مستر ماو: بلاش مبالغة يا شادي


معاذ: اعمل التصميم يا مستر ماو ونسوق على الماكيت وناخد رد فعل السوق بشكل عملي وبعد كده نحكم

مستر ماو: عل بركة الله

شادي: مستر ماو ... صلي على النبي في قلبك كدة وفكر كويس


مستر ماو: برجاء استكمال الدراسة ودعمها بالارقام كلما أمكن

وعاوز تقارير مكتوبة من غير سفسطة

اتفضلوا

تعليقات

المشاركات الشائعة من هذه المدونة

ربنا يحفظك يا ولدي

الاجتماع الأخير

والمصحف أنا مسيحي